
马尔巴大师教言集MARPA32གཏུམ་མོའི་གེགས་སེལ།
2-1-106a
༄༅། །གཏུམ་མོའི་གེགས་སེལ།
༄༅། །གཏུམ་མོའི་གེགས་སེལ་བཞུགས་སོ། །བླ་མ་དམ་པ་རིན་པོ་ཆེའི་ཞབས་ལ་སྤྱི་བོས་ཕྱག་འཚལ་ལོ། །གཏུམ་མོའི་སྒོམ་སྐྱོན་བཅོས་པའི་མན་ངག་ལ། བདེ་བ་འབར་ཏེ་བྱང་སེམས་འཆོར་ན། ཁ་ཟས་བཟངས་པ་སྲིད་པས་ཁ་ཟས་བཅུད་ཆུང་བ་དང་། ཉུང་དུ་བཟའ་དམ་ཚིག་ཉམས་པ་སྲིད་པས། གསང་བའི་དབང་བླ་མ་ལ་ཞུ། བར་དུ་གཅོད་པའི་[མཉམ་བཞག་(གཞག་)[མཉམ་བཞག་(གཞག་)ལ་ནི། འབྱུང་རྗེས་ཐོབ་མ་ནི།]ལ་ནི། འབྱུང་རྗེས་ཐོབ་མ་ནི།] བགེགས་ཞུགས་པ་སྲིད་པས། སྐེད་པ་ལ་སྐུད་པ་དཀར་ནག་གདགས། མཚན་མ་དར་ནག་པོས་བཅིང་ངོ་། །[བདེ་བ་མེད་ན།]
2-1-106b
སྦུ་ན་གུའི་འཚམས་(མཚམས་)སུ་གྲགས་(དྲག་)སྔགས་གདབ། རླུང་ཤ་མདང་བར་དུ་སོང་ནས་སྐྱ་རྦབས་སུ་སོང་ནས་མཛེར་འགྲོ་ཉེན་ཆེ་བས། དེ་བསལ་བ་ནི། སྔགས་པའམ་བཙུན་པ་གང་ཡིན་ཡང་སྐྲ་བཞར་ཏེ། གྲུབ་པ་ཐོབ་པའམ། སྔགས་ཀྱི་ནུས་པ་སྙེད་(རྙེད་)[མིས་མ་མཐོང་བར་བྱ། རྐེད་པ་དེས་རྐང་པའི་བར་དང་ཡར་ལ་བྱ། དར་རམ་སྐུད་པ་ནག་པོ་ལ་སུམ་སྒྲིལ་བྱ།] པའི་དྲི་ཆུ་དྲོན་མོས་བཀྲུས། སྐུ་མཉེ་བྱ། དེ་ལྟར་ལན་མང་དུ་བྱས་ན། [ཉི་མ་རེ་རེ་ལ་གསུམ་གསུམ།] ངེས་པར་སྐྱོན་ལས་གྲོལ་ལོ། །[བླ་མ་བླ་མ་དམ་པ་ལ་ཕྱག་དང་བསྐོར་བ་མང་དུ་བྱས་པ་དེས་ཡང་ཡང་ཞུས་སོ་ཡང་ཟློས་ཡིན་ནོ། །[བླ་མ་བླ་མ་དམ་པ་ལ་ཕྱག་དང་བསྐོར་བ་མང་དུ་བྱས་པ་དེས་ཡང་ཡང་ཞུས་སོ་ཡང་ཟློས་ཡིན་ནོ། །]]བླ་མ་དམ་པ་གསུང་ངོ་།། །།༄༅། །གཉིད་འོད་གསལ་བཞུགས་སོ། །ད་ནི་འོད་གསལ་གྱི་གདམས་ངག་བསྟན་ཏེ། གཉིད་འཐུག་པོའི་དུས་སུ། ལུས་བཅོས་པའི་གནད་དང་ལྡན་པས་ཡུལ་སྙིང་ཀའི་རྩ་མདུད་དུ་སེམས་ཀྱི་རྒྱལ་པོ་དེ་ན་གནས་པས་དེའི་ཐབས་ནི་དང་པོར་གཉིད་ཉལ་བར་བྱ་སྟེ། དེའང་དང་པོར་ཞག་གསུམ་ཙམ་ལུས་ཐང་ཆད་དུ་བཅུག་ལ། དེའི་དུས་སུ་ནུབ་མོ་གཉིད་བསྲུང་སྟེ། དགེ་སྦྱོར་ཅི་ནུས་ཀྱང་བྱ། དེ་ནས་ལུས་ལ་སྐུ་མཉེ་བྱ། ཁམས་བརྟས་སུ་བཅུག་ལ་ལུས་བཅོས་པའི་གནད་ནི་སེང་གེའི་ཉལ་སྟབས་ཀྱིས་ཅི་བདེ་བར་ཉལ་ལོ། །དུས་ནི་གཉིད་འཐུག་པོ་ལ་སྙིང་ཀ་སྟེ། སྙིང་ཀའི་འཁོར་ལོའི་འདབ་མ་བཞི་
2-1-107a
ལ་ཨ་ནུ་ཏ་ར་དང་། དབུས་སུ་ཧཱུཾ་བསམས་ཏེ། གཉིད་ཀྱི་ཐ་མལ་དུས་སུ་མདུན་གྱི་ཨ་ལ་སེམས་གཏད་པས་ཕུང་པོ་ཁམས་དང་སྐྱེ་མཆེད་ལ་སོགས་པའི་རྟོག་པ་རགས་པ་ནུབ་ནས་ནུ་ལ་སེམས་བཟུང་པས་སྣང་བ་སྟོང་པ་ཞེས་བྱའོ། །རྣམ་རྟོག་ཕྲ་བ་ནུབ་དུས་སུ་ཏ་ལ་སེམས་བཟུང་པས་སྣང་བ་མཆེད་པ་སྟོང་པ་ཆེན་པོ་ཞེས་བྱའོ། །དེ་ནས་གཉིད་ཧྲིབ་ཀྱིས་བྱུང་དུས་ན་ར་ལ་སེམས་གཟུང་སྟེ་སྣང་བ་ཉེར་ཐོབ་ཤིན་ཏུ་སྟོང་པའོ། །དེ་ནས་གཉིད་ཧྲུལ་གྱིས་འགྲོ་དུས་སུ་ཤེས་པ་ཧཱུཾ་ལ་བསྡུས་ཏེ་དེར་བདེ་སྟོང་གི་ངོ་བོར་ལྡེང་གིས་གནས་པ་ནི་འོད་གསལ་ཐམས་ཅད་སྟོང་པ་སྟེ། གཉིད་ཀྱི་རོ་བདེ་སྟོང་དུ་བྱུང་པ་ནི་བདེ་བ་གསལ་བ་རྟོག་པ་མེད་པར་འཆར་བ་ནི་འོད་གསལ་ཉམས་མྱོང་། དེའི་དུས་སུ་རྨི་ལམ་ནི་བསྲུང་སྟེ་འདིའི་འགལ་རྐྱེན་དུ་བཞེད་དོ།། །།དེ་ལྟ་བུའི་གཉིད་དེ་ནི་ཐ་མལ་གྱི་གཉིད་ཀྱི་འོད་གསལ་དེ་ཤིན་ཏུ་ཉེ་སྟེ། འོད་གསལ་རྟོགས་ལ་ཁད་པ་ཡིན་ལ་འདི་འདྲ་བའི་གནད་ཡོད་ན་འོད་གསལ་ལ་ཚེགས་མེད་དེ་གཉིད་ཐུམ་ཅིག་(ཞིག་)་ལོག་ནས་སློང་དུ་བཅུག་ལ་མ་རིག་པའི་གཉིད་དུ་སོང་ངམ་མ་སོང་ལྟ་བར་བྱས་ལ་ཡང་སྔར་བཞིན་ཉལ་ལོ། །དེའི་ནུབ་མོ་ཐུན་གསུམ་མམ་བཞི་ཅི་རིགས་པར་ཉལ་ལོ། །དེ་ནས་ཡང་ཐུན་གཉིས་སམ་གསུམ་ལ་
2-1-107b
སོགས་པར་བྱས་ཤིང་ཉལ་ཏེ་དེ་སྔར་ཕུང་པོ་ལ་སོགས་པ་ཁམས་འཕྲ་བར་གཞུག་གོ །ཁམས་ཀྱང་སེམས་ལ་གཞུག་གོ། །སེམས་ནི་མ་རིག་པ་ལ་གཞུག་སྟེ། དེ་ལྟར་གཉིད་ལོག་པས་མ་རིག་པ་ངང་གིས་འགགས་ཤིང་རྣམ་རྟོག་གི་དྲན་པ་བརྗེད་པ་འོང་ངོ་། །མ་རིག་པའི་གཉིད་ལྕགས་ཀྱུ་དང་འདྲ་བ་དེ་བཟུང་ནས་[སེམས་ནི་སེམས་པ་ལ་གཞུག་གོ། །[སེམས་ནི་སེམས་པ་ལ་གཞུག་གོ། །]]བདེ་སྟོང་དུ་ཉལ་བས་རྣམ་པར་ཤེས་པ་གང་ལ་ཡང་འགྲོ་བར་མི་བྱེད་དེ། འོད་གསལ་བ་ནི་གཉིད་མངོན་སུམ་དུ་ཉམས་སུ་མྱོང་བར་འགྱུར་རོ་ཞེའོ། །དེ་ནས་གཉིད་སད་པའི་རྗེས་ཐོབ་ནི་འདི་ལྟར་བསྒོམ་སྟེ། མདུན་དུ་ཡི་དམ་ལྷའི་ཐང་སྐུ་བཀྲམ་ལ་དེ་ལ་སེམས་རྩེ་གཅིག་པས་བལྟས་ལ་དེ་རང་ཉིད་ལ་གསལ་བར་བསྒོམ་མོ། །གསལ་བར་འདུག་ན་གསལ་བ་དེ་ཉིད། བདེ་སྟོང་དུ་ལྟེང་གིས་མི་དམིགས་པར་བསྒོམ་ལ། སླར་ཡང་གསལ་བར་བྱ་སྟེ་ཐང་ཀ་བལྟ། དེ་ནས་ཡང་ཐང་ཀ་ཁོ་ན་བཞིན་དུ་བསྒོམ་ལ། དེ་ཉིད་བདེ་སྟོང་དུ་ལྟེང་གིས་བསྒོམ་སྟེ། དེའང་སྟོང་ཉིད་ངང་ལས་རོ་བདེ་བར་ཕྲིལ་ཕྲིལ་ཤར་བར་བསྒོམ་སྟེ། ལྷ་དེ་རེས་སྐུར་བསྒོམ་རེས་བདེ་སྟོང་དུ་བསྒོམ་པས་གོམས་པའི་ཚད་ནི་རང་ཉིད་བདེ་སྟོང་སྐྱེ་མེད་དུ་གནས་པའི་རོ་བདེ་བར་འཆར་རོ། །དེའི་དུས་སུ་ནུབ་མོ་ལ་སོགས་པའི་གཉིད་ཉལ་དུས་སུ། གཉིད་ལ་སྔར་བཞིན་བསྒོམ། །རྗེས་ཐོབ་
2-1-108a
ལ་དེ་ལྟར་བསྒོམས་པས་ལུས་ལ་བདེ་བ་ལ་སོགས་པ་འོང་། སྣང་བ་བདེ་སྟོང་ངང་དུ་ལྷང་ལྷང་ཤར་ཞིང་འོང་ངོ་།། །།དེ་ནས་ཚེ་འདི་ཉིད་ལ་འོད་གསལ་དུ་འདུག་སྟེ། མཆོག་གི་དངོས་གྲུབ་ཐོབ་པར་འགྱུར་རོ།། །།གལ་ཏེ་ཚེ་འདིར་མཆོག་མ་ཐོབ་ཀྱང་བར་དོར་ཤེས་པ་འོད་གསལ་ཟིན་པར་འགྱུར་ལ། དེ་ནས་བར་དོར་སངས་རྒྱས་ཏེ། རང་ལ་དབང་མེད་པར་བར་དོར་འཇུག་མི་སྲིད། གལ་ཏེ་མ་ལ་དུ་ཞུགས་ཏེ། ལུས་ལེན་དུས་སུ་ཡང་། གཞན་གྱི་དོན་དུ་རང་ལ་དབང་ཡོད་པར་རང་དགར་ཞུགས་ཏེ། ལུས་ལེན་པ་ནི་སྒྱུ་ལུས་བསྒོམ་པའི་གང་ཟག་དང་། འདི་གཉིས་ལ་སྲིད་ཀྱི། དེ་མ་ཡིན་ན་ལུས་མི་ལེན་ནོ། །སློབ་དཔོན་ཟླ་བ་ཨ་ཀྱང་ལོ་བཅུ་གསུམ་གྱི་བར་དུ་གཉིད་ཀྱིས་བསྒོམས་པས་མཆོག་གི་དངོས་གྲུབ་བརྙེས་སོ། །དེ་ནི་གཉིད་འཐུག་པོ་ཡིས། ཤེས་པ་འོད་གསལ་དུ་ཞུགས་པའོ། །འོད་གསལ་གྱི་མན་ངག་གོ། །བཤེས་གཉེན་ཆེན་པོ་རྫོགས་སོ།། །།ཐུགས་རྗེས་གཟིགས་ལ། ཆོས་ཀྱི་སྙིང་པོ། བླ་མ་རྗེ་རིན་པོ་ཆེས། ཐུགས་ལ་བཏགས་ནས་གནང་བ་ལགས་སོ། །སྐྱེ་མེད་ཕྱག་རྒྱ་ཆེན་པོ་ནི། དབང་གི་དུས་སུ་ཆོས་ཉིད་ངོ་བསྟན། དེའི་ཉམས་མྱོང་གིས་བློ་གཞག་པའི་ཐབས་ནི། གཞུང་
2-1-108b
ལས་ཤེས་པར་བྱའོ། །ཐུགས་ལ་བཏགས་ནས་གནང་བ་ལགས་སོ། །རྫོགས་སོ།། །།༄༅། །ཨ་ཐུང་བཞུགས་སོ། །བླ་མ་དམ་པ་རྣམས་ལ་ཕྱག་འཚལ་ལོ། །བླ་མའི་ཞལ་ནས་བར་དོ་རྣམ་གསུམ་ལ་བསྲེ་འཕོ་གཉིས་ཀྱི་གདམས་པ་བྱ་གསུང་། དེ་ལ་བར་དོ་གསུམ་ནི་སྐྱེ་ཤི་བར་དོ་དང་། རྨི་ལམ་བར་དོ་དང་། སྲིད་པ་བར་དོའོ། །སྐྱེ་ཤི་བར་དོ་ནི། ད་ལྟའི་ལུས་གནས་པ་འདི་ཡིན་པས་བསྐྱེད་རྫོགས་གཉིས་ཀྱི་གདམ་(གདམས་)ངག་བསྒོམ། དེ་ཡང་ཐ་མལ་གྱི་རྣམ་རྟོག་དང་མི་རྟོག་པའི་ཡེ་ཤེས་སུ་བསྲེ་སྟེ། ཨ་ཐུང་ཏེ་ལོ་པའི་གདམས་པ་བསྒོམ། དེ་ཡང་དཔེ་དོན་གཉིས་ཏེ། དཔེ་ནི་ལམ་པོ་ཆེ་ཅིག་གི་མདུན་གླང་པོ་ཆེ། གཡས་ན་སྦྲུལ། གཡོན་ན་ཕག་པ་ཡོད་པ་ལ། ལམ་དེར་འགྲོ་བའི་མི་རྣམས་དེ་གསུམ་གྱིས་བསད་ཀྱིས་དོགས་པས་རྒྱུ་འགྲུལ་འཆད། ཁོ་རང་རྣམས་ཀྱང་འགུལ་མི་ཤེས་ཏེ། གླང་པོ་ཆེ་འགུལ་ན་སྦྲུལ་སྣ་བུག་ཏུ་འགྲོ སྦྲུལ་འགུལ་ན་ཕག་རྒོད་ཀྱིས་གསོད། ཕག་པ་འགུལ་ན་གླང་པོ་ཆེ་སྨྱོན་པས་ཟ། དེས་ན་གཅིག་གིས་གཅིག་འགུལ་མི་ཤེས་ཏེ། ཁོང་རྣམས་འདོད་ཁམས་པར་སོང་པས་ཟས་དང་བྲལ་བའི་ཕྱིར་ཞག་གཅིག་ན་འཆིའོ། །དེ་ནས་རོ་ལ་སུ་ཡང་མི་འཇིགས་པས་ཡར་འགྲོ་མར་འགྲོ་བྱེད་དོ། །དེའི་དོད་ནི། ལམ་པོ་ཆེ་དང་འདྲ་བ་
2-1-109a
སེམས་ཅན་གྱི་རྒྱུད་ལ་ཡོད་པའི་གཉུག་མའོ། །གླང་སྦྲུལ་ཕག་གསུམ་ལྟ་བུ་འདོད་ཆགས་ཞེ་སྡང་གཏི་མུག་གསུམ་མོ། །ལམ་གྱི་རྒྱུ་འགྲུལ་བཅད་པ་ལྟ་བུ་ཁོང་གསུམ་གྱིས་ས་ཧ་ཛའི་ཉམས་སྐྱེར་མི་སྟེར་བའོ། །ཟས་དང་བྲལ་བས་ཁོང་རང་གསུམ་ཞག་གཅིག་ན་འཆི་བ་བཞིན་དུ་གདམས་ངག་འདི་བསྒོམ་ན་ཞག་གཅིག་ན་དུས་གསུམ་མི་རྟོག་པར་འཆར་བར་བྱེད་དོ། །དེ་ནས་རོ་ལ་སུ་ཡང་མི་འཇིགས་པ་བཞིན་དུ་རྒྱུ་འགྲུལ་བྱེད་པ་ལྟར་ཞག་གཅིག་ཏུ་བསྒོམས་པས་གཉུག་མ་ས་ཧ་ཛ་རྟོགས་ནས་གཉིས་སུ་མེད་པའི་ཡེ་ཤེས་རྒྱུ་འགྲུལ་བྱེད་དོ། །དེ་ལྟ་བུའི་གདམ་(གདམས་)ངག་དེ་སྔོན་འགྲོ་ལུས་དང་རླུང་སྦྱང་པའོ། །དེའི་དཔེ་ནི་ཞོ་རྐྱལ་དང་འདྲ་གསུང་ངོ་། །དཔེར་ན་ཞོ་རྐྱལ་གྱི་ཁ་མ་སྤངས་པར་བཙན་ཐབས་སུ་ཁ་ཕྱེ་སྟེ་ཞོ་བླུགས་ན་ཞོ་ཡང་ཆུད་ཟོས་ལ་ཞོ་རྐྱལ་ཡང་འདྲལ། དེ་བཞིན་དུ་ལུས་རྒོད་ལ་རླུང་རྒོད་བསྡམས་ན་ཉམས་མི་འབྱུང་། ན་ཚ་འབྱུང་ལུས་ཆུད་ཟོས་པར་འགྱུར། ཞོ་རྐྱལ་སྦངས་ཏེ་ཞོ་བླུགས་ན་རྐྱལ་པ་ཡང་ཆུད་མི་ཟོས། ཞོ་ཡང་མི་འབོ་བ་བཞིན་དུ་ལུས་དང་རླུང་སྦྱངས་ཉམས་སྐྱེ་ན་ཚ་མི་འབྱུང་ངོ་། །དེ་ལ་ལུས་བཅོས་ཏེ་རླུང་བསྡམས་ནས་རླུང་མ་ཐུབ་ན་དྲག་པོར་བཏང་། ལུས་འཆོས་པ། མ་བདེ་ན་གང་མ་བདེ་བ་དེ་བསྙོང་བྱ། 
2-1-109b
དེ་ལྟ་བུ་དེ་ཞག་རེ་ལ་ཐུན་དྲུག་དྲུག་བྱས་པའི་ཞག་གསུམ་བཞི་བསྒོམ་མོ། །དེ་ནས་མན་ངག་དངོས་ལ་གསུམ་སྟེ། དུས་ཀྱི་གནད་དང་། ཡུལ་གྱི་གནད་དང་། ལུས་བཅོས་པའི་གནད་དོ། །དེ་ལ་དུས་ཀྱི་གནད་ནི་རླུང་ཨ་བ་དྷཱུ་ཏིར་རྒྱུ་བའི་དུས་སུ་བསྒོམ། རྟགས་ནི་སྣ་བུག་གཉིས་ག་ནས་རླུང་མཉམ་པོར་ནལ་ནལ་རྒྱུ་བའི་དུས་སུ་བསྒོམ། དེ་མ་ཡིན་པའི་དུས་སུ་ཡང་བསྒོམ་སྟེ། ཁྱད་པར་དུ་དེ་ལ་བསྒོམ་ན་ཉམས་མྱོང་སྐྱེའོ། །དེ་ལ་ལུས་བཅོས་པའི་གནད་ནི་ལྔ་སྟེ། རེ་མིག་ལྟར་བསྣོལ་བ་དང་། རྒྱ་མདུད་ལྟར་བསྡམ་པ་དང་། མདའ་ལྟར་བསྲང་བ་དང་། ལྕགས་ཀྱུ་ལྟར་དགུག་པ་དང་ལི་རི་ལྟར་བསྒྲིམ་པའོ། །དེ་ལྟར་རེ་མིག་ལྟར་བསྣོལ་བ་ནི། རྐང་པ་གཡས་པས་གཡོན་པ་ལ་འཁྱུད་ནས་ཚིགས་གཉིས་སྤྲད། དེ་ལ་སྒོམ་ཐག་གིས་བཅིང་། དགོས་པ་འོག་རླུང་རང་བཞིན་གྱིས་སྡོམ་པའོ། །རྒྱ་མདུད་ལྟར་བསྡམ་པ་ནི། ལག་པ་མཉམ་གཞག་གི་ཕྱག་རྒྱ་བྱས་ལ། ལྟེ་བ་ནས་སོར་གཉིས་ཡར་བཞག །སོར་གཉིས་མར་བཞག་པ་དེར་བསྟམ། །དགོས་པ་ནི་ཨ་བ་དྷཱུ་ཏིའི་ཁ་རང་ཤུགས་ཀྱིས་འབྱེ་སྟེ། དཔེར་ན་ཉ་རློན་པའི་ལྟག་པ་མནན་པ་དང་འདྲ། མདའ་ལྟར་བསྲང་པ་ནི་སྒལ་ཚིགས་གཅིག་གི་སྟེང་དུ་གཅིག་བཞག་ལ་མནན་མདའ་དྲང་ཐར་གྱིས་བསྲང་། དགོས་པ་
2-1-110a
ནི་རྩ་རྣམས་ས་ས་སོ་སོར་གནས་པའོ། ལྕགས་ཀྱུ་ལྟར་དགུག་པ་ནི། སྟེང་འོག་དགུག་པ་ནི། དགོས་པ་ནི་སྟེང་རླུང་རང་བཞིན་གྱིས་སྡོམ་པའི་དགོས་པ་ཡོད་དོ། །ལི་རི་ལྟར་བསྒྲིམ་པ་ནི། ཤེས་པ་བསྒྲིམ་པའོ། །དེ་ལྟར་ལུས་བཅོས་པ་དེ་ཡང་མིས་མ་མཐོང་པར་གོས་ཀྱིས་དྲིལ་ནས་སྦས་ནས་བྱ་གསུང་ངོ་། །དེ་ལ་ཡུལ་གྱི་གནད་ནི་འཁོར་ལོ་བཞིར་ཤེས་པ་མི་གཏོད། རྩ་གསུམ་འདོམ་པའི་འདོམ་གསུམ་དུ་ཤེས་པ་གཏད། ལར་ཨ་བ་དྡཱུ་ཏིས་འཁོར་བཞི་ཕུག་ནས་ཡོད། རྩ་གཉིས་འཁོར་ལོ་བཞི་ལ་འགྱུར་བ་ཡིན དྷཱུ་ཏིའི་འོག་ཚངས་པའི་བུ་ག་ལ་གཏད། ཞབས་ལྟེ་བ་ནས་སོར་བཞི་ནས་ཟད། བྱང་སེམས་རྩ་གཞན་གཅིག་གིས་མཐུད་ནས་འབབ་པ། རྩ་གཉིས་ཀྱི་འོག་སྨིན་མཚམས་སུ་ཟུག གསེང་སྣ་བུག་གཉིས་ཀྱི་རླུང་ཡིན་སྨད་གཉེར་པོ་བྱ་བ་ནས་འཁྱུད་ནས་ཨ་བ་དྷཱུ་ཏིའི་ཁ་ཚུད། དེ་ལྟར་གནས་པའི་རྩ་གསུམ་གྱི་སུམ་མདོན་འདིར་ཤེས་པ་གཏད་དོ། །འདིར་ཤེས་པ་གཏོད་པ་ལ་དམིགས་ལུགས་གསུམ་ཏེ་(སྟེ་)ཐིག་ལེ་ཉ་གང་བ་ལ་དམིགས་པ་དང་། གཏུམ་མོའི་མེ་ལ་དམིགས་པ་དང་། རྣམ་པར་མི་རྟོག་པའི་དོན་ལ་དམིགས་པའོ། །ཐིག་ལེ་ཉ་གང་བ་ལ་དམིགས་པ་ནི་ཟླ་བ་ཉ་གང་བ་ལྟ་བུའི་ཐིག་ལེ་ཀྱ་ཀྱིལ་ཀྱིལ་བ་ཅིག་
2-1-110b
ཤེས་པ་རྩེན་ནེ་གཞག་པའོ། །གཏུམ་མོའི་མེ་ལ་དམིགས་པ་ནི་ཙན་དྷ་ལི་རིང་སྟེ་རིང་ན་སྙིང་ཀར་ཕྱིན་པ། ཐུང་སྟེ་ཐུང་ན་སོར་བཞི་པ། མེ་མར་གྱི་རྣམ་པ་ལྟ་བུ་དམར་ལྟེམ་ལྟེམ་པ་ཅིག་ལ་ཤེས་པ་གཞག རྣམ་པར་མི་རྟོག་པའི་དོན་ལ་དམིགས་པ་ནི་ཨ་བ་དྷཱུ་ཏིར་རླུང་ཚུད་པར་བསམས་ལ། དེ་ནས་རྩ་ཡིད་ལ་མི་བྱེད། བྱང་ཆུབ་ཀྱི་སེམས་ཡིད་ལ་མི་བྱེད་པར་བསྒོམ་པའོ། །དེ་དག་ལས་གང་བསྒོམ་ཅེ་(ཞེ་)ན་གཏུམ་མོའི་མེ་ལ་དམིགས་པ་བྱ་གསུངས། མེ་ལ་དམིགས་པ་འདི་ལ་ཁ་ཅིག་ལ་མེ་སྟག་ཙམ་ལ་སེམས་ཟིན། ཁ་ཅིག་ལ་མེ་ཁབ་ཙམ་ལ་སེམས་ཟིན། ཁ་ཅིག་རྩེ་གསུམ་པར་སེམས་ཟིན། གང་ལྟར་སེམས་ཟིན་ཟིན་དུ་བསྒོམས་པས་ཆོག་གསུངས། དེ་ལྟར་མི་ཤེས་པ་ཅིག་བསྟན་པས་དེ་ཙམ་ཅིག་(ཞིག་)བྱུང་ཡང་བླ་མའི་ཞལ་ནས་ཤེས་པ་ཅིག་ལ་བསྟན་ན་འདི་ལས་མེད་གསུངས། དུས་འདིའི་དུས་སུ་ལུས་འདི་ལྟར་ཆོས་ལ་སེམས་འདིར་གཏོད་དང་ཡེ་ཤེས་མི་སྐྱེ་མི་སྲིད་བྱ་བ་ཡིན་གསུང་(གསུངས)། དེ་ལྟར་ཞག་གཅིག་བསྒོམས་ན་རྟགས་འབྱུང་སྟེ། དང་པོ་དྲོ་བ་ལྟ་བུ་འབྱུང་། གཉིས་པ་བདེ་བ་ལྟ་བུ་འབྱུང་། གསུམ་པ་མི་རྟོག་པ་སྐྱེ་བར་འགྱུར། གལ་ཏེ་དྲོད་མ་སྐྱེས་ན་སྲིན་པོའི་ཞལ་དང་ཙུམ་བྱ། གཞན་དུ་སྲིན་པོའི་ཞལ་གཟུམ་མི་དགོས་གསུང་། 
2-1-111a
ལྟེ་བ་ན་གནས་པའི་ཨ་དེ་ནི་རྩ་གསུམ་འདོམ་པའི་འདོམ་གསུམ་ན་ཡོད་པའོ། །ཨ་དེའི་རང་བཞིན་ནི་མི་བསྒོམས་པའི་དུས་སུ་སེར་པོ་རྩ་དམར་བ་ཅིག་ཡོད། བསྒོམས་པའི་དུས་སུ་དམར་ལྷག་ལྷག་པ་མར་མེའི་རྩེ་མོ་ལྟ་བུའོ། །དེ་བས་ན་ག་བུར་ཉིད་ནི་བདག་མེད་མ། །བདེ་བ་བདག་མེད་ཚུལ་ཅན་ཉིད། །དེ་ཡི་བདེ་བ་ཕྱག་རྒྱ་ཆེ། །ལྟེ་བའི་དཀྱིལ་འཁོར་ཉིད་དུ་གནས། །དབྱངས་ཡིག་དང་པོའི་རང་བཞིན་ཏེ། །བློ་ཞེས་སངས་རྒྱས་རྣམས་ཀྱིས་བརྟགས། །ཞེས་གསུངས་པ་ཡིན་ནོ། །རྣམ་རྟོག་མི་རྟོག་པར་བསྲེ་བའི་མན་ངག་ཨ་ཐུང་ཞེས་བྱ་བ་སྟེ། ཏེ་ལོ་པའི་ཨུ་པ་དྷེ་ཤ །གཏུམ་མོའི་རྫོགས་རིམ།། །།ཨྠིི། ༄༅། །རེ་(རེའུ་)མིག་ལྟར་བསྣོལ་བ། རྒྱ་མདུད་ལྟར་བཅིང་(བཅིངས་)པ། མདའ་ལྟར་བསྲང་(བསྲངས་)པ། ལྕགས་ཀྱུ་ལྟར་དགུག་པ། ལི་རི་ལྟར་བསྒྲིམ་པ། མ་བསྒོམས་ན་ཨ་སེར་པོ། །བསྒོམས་ན་དམར་པོ། ཐིག་ལེ་ཉ་གང་བ། བཏུམ་མོའི་མེ་ཁབ་ཙམ་པ། རྣམ་པར་མི་རྟོག་པའི་དོན་ལ་དམིགས་པའོ། །དེ་ལ་རྩ་རླུང་ཡིད་ལ་མི་བྱེད་དྷཱུ་ཏིའི་འོག་ཉ་མགོ་ཉ་ལྡག་(ལྟག་)མནན་པ་དང་འདྲ་སྟེ། བཙན་ཐབས་སུ་ཆུད། མྱུར་བར་འདོད་ན་སྲིན་པོའི་ཞལ་གཟུམ། དྲོད་མ་སྐྱེས་ན་སྲིན་པོའི་ཞལ་དང་ཙུམ་བྱ། ཆགས་ཅན་བུད་མེད། །ཆགས་
2-1-111b
བྲལ་ཨ། འོག་རླུང་ཚ་བ། སྟེང་རླུང་བསིལ་བ། ལྕགས་ཀྱུས་བཀུག ཚ་གྲང་རླུང་བསྲེ། རྩ་གཉིས་ཀྱི་འགོ་སྨིན་མཚམས་སུ་ཟུག་ནས་གསེང་སྣ་བུག་གཉིས་ཀྱི་རླུང་། ཞབས་དྷཱུ་ཏཱིར་ཚུད་ནས་ལྟེ་བ་ནས་སོར་བཞི་ནའོ། ཏེ་ལོ་པའི་གདམས་པ་ཨྠིི།། །།[འདི་རྣམས་གཅིག་གིས་ཅིག་འགུལ་མི་ཤེས་པས་ཞག་བདུན་ན་འཆི་བ་བཞིན་དུ་ཞག་བདུན་བསྒོམ་ན་དུག་གསུམ་མི་རྟོག་པར་འཆར།]


目录
གཏུམ་མོའི་གེགས་སེལ།